25 ივნისს Brent-ის მარკის ნავთობის აგვისტოს ფიუჩერსების ფასი ბარელზე 72,48 დოლარამდე შემცირდა, რაც თებერვლის ბოლოდან მოყოლებული მინიმალური მაჩვენებელია. მოგვიანებით კოტირებები ოდნავ დაკორექტირდა და ბარელზე 73 დოლარს გადასცდა. ამერიკული WTI მარკის ნავთობი კი 70 დოლარის ფარგლებში იყო, იტყობინება Reuters-ი.
გარდატეხა მას შემდეგ მოხდა, რაც ვაშინგტონმა და თეირანმა ხელი მოაწერეს ურთიერთგაგების მემორანდუმს, რომელიც ირანის ბირთვულ პროგრამაზე 60-დღიანი მოლაპარაკებების ფანჯარას ითვალისწინებს. ტანკერებმა ჰორმუზის სრუტეში მოძრაობა განაახლეს და ახლო აღმოსავლეთში მიწოდების შეფერხების შიშიც გაქრა.
აშშ-ის ენერგეტიკის მინისტრის, კრის რაიტსის განცხადებით, გადაზიდვების მოცულობა უკვე უახლოვდება ომამდელ დონეს. მხოლოდ ბოლო 24 საათის განმავლობაში ჰორმუზის სრუტეში სულ მცირე 20 მილიონმა ბარელმა ნავთობმა გაიარა.
ვითარების სრული ნორმალიზებისთვის კი, კიდევ რამდენიმე კვირა იქნება საჭირო — აკვატორია განაღმვას საჭიროებს, ხოლო Kpler-ის მონაცემებით, მიუხედავად იმისა, რომ ტრაფიკი საგრძნობლად გაიზარდა, ის ჯერ კიდევ ჩამორჩება ძველ მაჩვენებლებს. ამასთანავე, ექსპერტები აღნიშნავენ, რომ ირანის გარშემო ნებისმიერ ახალ გამწვავებას ბაზრის საპირისპირო მიმართულებით შემობრუნება რამდენიმე დღეში შეუძლია.
