ბლოკჩეინ TRON-ის დამფუძნებელმა, ჯასტინ სანმა, კალიფორნიის ფედერალურ სასამართლოში სარჩელი შეიტანა World Liberty Financial-ის წინააღმდეგ. ეს არის კრიპტოპლატფორმა, რომელიც დონალდ ტრამპის ოჯახთანაა დაკავშირებული.
სანის ვერსიით, მან კომპანიაში 45 მილიონი დოლარის ინვესტიცია განახორციელა, რის სანაცვლოდაც ჯამში 4 მილიარდი WLFI ტოკენი მიიღო. თუმცა, გარკვეულ მომენტში მან აღმოაჩინა, რომ ტოკენები სრულად გაყინული იყო, თავად კი პროექტის მართვაში ხმის მიცემის უფლება ჩამოერთვა.
მოსარჩელის თქმით, მოლაპარაკებების ნაცვლად, კომპანიამ კონტრაქტის პირობები უკანა თარიღით გადაწერა და ჩუმად მიითვისა უფლება, რომ ტოკენების მფლობელები შავ სიაში ყოველგვარი კენჭისყრის, შეტყობინებისა და ახსნა-განმარტების გარეშე შეიყვანოს.
სანმა განმარტა, რომ მომხდარში პირადად ტრამპს არ ადანაშაულებს. მისი რწმენით, პრეზიდენტმა უბრალოდ არ იცის, როგორ განკარგავენ მის ბრენდს პროექტის თანადამფუძნებლები. თავის მხრივ, World Liberty Financial-ის გენერალურმა დირექტორმა, ზაკ უიტკოფმა, სანის სარჩელს უწოდა „სასოწარკვეთილი მცდელობა საკუთარი არაკეთილსინდისიერი ქმედებებიდან ყურადღების გადასატანად“.
