პარტია „ხალხის ძალის“ წევრმა დავით ქართველიშვილმა მედიასთან საუბარში კომენტარი გააკეთა ფრანგულ გამოცემა Intelligence Online-ში გამოქვეყნებულ სტატიაზე, სადაც ნათქვამია, რომ საფრანგეთის საგარეო დაზვერვის სამსახური იძულებული გახდა, თბილისიდან პარიზში გაეწვია დაზვერვის ორი აგენტი.
ქართველიშვილის თქმით, დაზვერვის აგენტების გაწვევით, საფრანგეთმა დაადასტურა, რომ სადაზვერვო საქმიანობას ეწეოდა საქართველოში.
„მინდა მივულოცო ჩვენს სპეცსამსახურებს ბრწყინვალედ ჩატარებული ოპერაცია. ნებისმიერი ქვეყნის სპეცსამსახურისთვის ჯაშუშების, უცხო ქვეყნის აგენტების, მზვერავების გამოვლენა უმაღლესი კლასია, რაც კი შეიძლება სპეცსამსახურს ჰქონდეს თავის საქმიანობაში.
ის, რომ დაზვერვის აგენტების გაწვევა მოხდა საფრანგეთის მთავრობის მიერ ისე, რომ ჩვენს ხელისუფლებას არანაირი დიპლომატიური სკანდალის რანგში არ აუყვანია ეს ფაქტი, მეტყველებს ჩვენი მხრიდან კეთილი ნების ჟესტზე და განზრახვაზე, რომელსაც არ ჰქონდა მიზნად ორი ქვეყნის – საფრანგეთის და საქართველოს ურთიერთობების დაძაბვა.
მსგავსი სადაზვერვო მუშაობის მიზანი იყო დივერსიული ან პოლიტიკური ზრახვები, თუმცა კონკრეტულ შემთხვევაში უფრო პოლიტიკურ ზრახვებს ვხედავ. ჩანს გარკვეულწილად უცხო ქვეყნის და დასავლელი ევროპელი მზვერავების ნადირობა იმ ადამიანებზე, რომლებსაც წარსულში ან აწმყოში ჰქონდა ან აქვს რაიმე ურთიერთობები ჩვენი ხელისუფლების მაღალი ეშელონების წარმომადგენლებთან იმ მიზნით, რომ მათგან მოეპოვებინათ საჭირო ინფორმაცია ან გამოეყენებინათ ისინი კონკრეტული ზრახვებისთვის, რომელსაც ჩვენ უკანასკნელი წლებში ვხედავთ.
მათი გლობალური მიზანი, ჩვენი ხელისუფლების ჩანაცვლებაა იმ არაკანონიერი გზით, რასაც ჰქვია სახელმწიფო გადატრიალება, ტექნიკური მთავრობების შექმნა, პარალელური პარლამენტის შექმნა და ა.შ. ამ პოლიტიკური მიზნებისთვის მზად უნდა ვიყოთ. არა მხოლოდ საფრანგეთის, შესაძლოა სხვა ქვეყნის სპეცსამსახურებიც, რომლებიც დაინტერესებულები არიან საქართველოში სიტუაციის არევით, იყენებენ ან შემდგომში გამოიყენებენ მსგავსი ტიპის კონტინგენტს.
შეგახსენებთ, რომ მსგავსი მოვლენები განვითარდა აზერბაიჯანშიც, მაშინ საფრანგეთსა და აზერბაიჯანს შორის მკვეთრად გაუარესდა ურთიერთობა. აზერბაიჯანმა ჩვენგან განსხვავებით პერსონა ნონ გრატად გამოაცხადა მზვერავები, რომლებიც 48 საათის განმავლობაში გააძევეს ქვეყნიდან. ყოველივეს მოყვა დიპლომატიური სკანდალი, ელჩის გამოწვევა ქვეყნიდან და ა.შ. საქართველო მსგავს სიტუაციაში არ მოიქცა ხისტად, არ დაძაბა ქვეყნებს შორის ურთიერთობები, თუმცა ამის მორალური უფლება ნამდვილად ჰქონდა.
ბოლოდროინდელ მოვლენებში, ქუჩის გაუთავებელ აქციებში, სახელმწიფო გადატრიალების არაერთ მცდელობაში დაინტერესებულია ძალიან ბევრი ძალები და რა თქმა უნდა, არ გამოვრიცხავ, რომ კიდევ ბევრი ქვეყნის სპეცსამსახურების დაინტერესების ობიექტი იყოს საქართველო,“ – განაცხადა დავით ქართველიშვილმა
