აშშ-ის პრეზიდენტის, დონალდ ტრამპის ყოფილმა მრჩეველმა ჯონ ბოლტონმა, რომელიც მოგვიანებით მისი აქტიური კრიტიკოსი გახდა, „ჯაშუშობის შესახებ“ კანონის დარღვევის საქმეზე გამოძიებასთან საპროცესო შეთანხმება გააფორმა. ამის შესახებ ამერიკული მედიასაშუალებები ინფორმირებულ წყაროებზე დაყრდნობით იტყობინებიან.
როგორც CNN აღნიშნავს, ბოლტონმა, შესაძლოა, თავიდან აიცილოს პატიმრობა, თუმცა მან აიღო ვალდებულება, გადაიხადოს ჯარიმა 2 მილიონ დოლარზე მეტი ოდენობით.
ბოლტონს 2025 წელს ბრალი წაუყენეს 18 პუნქტით, რაც სახელმწიფო საიდუმლოების არასწორად მოპყრობას ეხება. გამოძიების მტკიცებით, თავისი მემუარების — „ოთახი, სადაც ეს მოხდა“(რომელშიც მან ტრამპის მუშაობა გააკრიტიკა) — მომზადების დროს, ბოლტონმა პირად დღიურში საიდუმლო ინფორმაცია ჩაინიშნა და ამ ჩანაწერებს მესამე პირებს, კერძოდ კი მეუღლესა და ქალიშვილს უზიარებდა.
თავდაპირველად ბოლტონს 100 წელზე მეტი პატიმრობა ემუქრებოდა. გამოძიებასთან შეთანხმების ფარგლებში, მაქსიმალური სასჯელი ახლა შესაძლოა 60 თვემდე შემცირდეს, მინიმალური კი ნულს უდრის.
CNN, The Hill, NBC News და სხვა მედიასაშუალებები წყაროებზე დაყრდნობით იუწყებიან, რომ პროკურატურა დათანხმდა ბოლტონის მიერ ბრალის აღიარებას მხოლოდ ერთ პუნქტში — ეროვნულ უსაფრთხოებასთან დაკავშირებული ინფორმაციის უკანონო შენახვაში. ამ ინფორმაციის გადაცემასთან დაკავშირებული დანარჩენი ბრალდებები კი მას მოეხსნება.
ბოლტონმა, რომლის წინააღმდეგ აღძრულ საქმესაც ზოგიერთი ტრამპის მხრიდან „შურისძიებად“ მიიჩნევს, პოზიციის შეცვლის შესახებ ოფიციალურად 26 ივნისის სასამართლო სხდომაზე უნდა განაცხადოს.
რესპუბლიკელისთვის კონკრეტული სასჯელის განსაზღვრის გადაწყვეტილება მერილენდის ფედერალურ საოლქო მოსამართლეზე, ობამას მიერ დანიშნულ თეოდორ ჩუანგზე იქნება დამოკიდებული.
