ბოლო დღეებში დონალდ ტრამპს ირანზე ახალი სამხედრო დარტყმების რამდენიმე ვარიანტი წარუდგინეს, – წერს The New York Times-ი რამდენიმე ამერიკულ წყაროზე დაყრდნობით.
გაზეთის ინფორმაციით, აშშ-ის პრეზიდენტისთვის შეთავაზებული ვარიანტები თეირანში მდებარე არასამხედრო ობიექტებზე დარტყმებს ითვალისწინებს. დეტალები იმის შესახებ, თუ რა ტიპის ობიექტებია, უცნობია.
The New York Times-ის წყაროების თქმით, ტრამპს საბოლოო გადაწყვეტილება ჯერ არ მიუღია, თუმცა ახალი დარტყმის შესაძლებლობას „სერიოზულად განიხილავს“. მაღალჩინოსანმა სამხედრო პირმა განაცხადა, რომ ნებისმიერ პოტენციურ თავდასხმამდე რეგიონის სარდლობას ამერიკული პოზიციების გასამაგრებლად და ირანის მხრიდან მოსალოდნელი საპასუხო დარტყმებისთვის მოსამზადებლად დრო დასჭირდება.
ტრამპის ადმინისტრაციის წარმომადგენლების მიერ ვარიანტების წინასწარი განხილვის შესახებ The Wall Street Journal-იც წერს. ერთ-ერთი ჩინოვნიკის თქმით, განიხილებოდა ფართომასშტაბიანი საჰაერო დარტყმა ირანის სამხედრო ობიექტებზე. სხვა წყარო კი აცხადებს, რომ მოქმედების გეგმაზე კონსენსუსი მიღწეული არ არის და ჯერჯერობით არც ამერიკული სამხედრო ტექნიკის და არც პერსონალის გადასროლა დარტყმისთვის მოსამზადებლად არ მომხდარა.
წყაროები ამ განხილვებს ჩვეულებრივი დაგეგმარების ნაწილად მოიხსენიებენ და აზუსტებენ, რომ ირანზე გარდაუვალი თავდასხმის ნიშნები ამ დროისთვის არ არსებობს.
თეთრმა სახლმა კომენტარის მოთხოვნის საპასუხოდ მიუთითა ტრამპის პოსტზე სოციალურ ქსელ Truth Social-ში, სადაც ნათქვამია: „ირანი თავისუფლებისკენ ისწრაფვის, შესაძლოა ისე, როგორც არასდროს. აშშ მზადაა დასახმარებლად!“
საპროტესტო აქციები თეირანში ორი კვირის წინ, ეკონომიკური სიდუხჭირის გამო დაიწყო. მას შემდეგ გამოსვლები ირანის ყველა პროვინციის 100-ზე მეტ ქალაქსა და დაბაში გავრცელდა. Time-ის ცნობით, ქციებზე 200-ზე მეტი ადამიანი დაიღუპა.
