რადიკალების მიერ ეკლესიაზე თავდასხმას გამოეხმაურა პარტია „ხალხის ძალის“ წევრი დავით ქართველიშვილი. „როგორ შეიძლება, ჩვენ, მორწმუნეებმა, ღმერთთან მებრძოლ ადამიანებს მოვთხოვოთ რაიმე სიბრძნე?“ — განაცხადა ანალიტიკოსმა და აღნიშნა, რომ საქართველოს სახელმწიფოს არსებობის მანძილზე ათმა იმპერიამ ვერ შეძლო ქართველების ქრისტიანობისგან ჩამოშორება, შესაბამისად, ამას ვერც გლობალისტურ-ლიბერალური იმპერია შეძლებს.
“ამ ადამიანებში [რადიკალებში] ბრიუსელის მიერ რომ არის ჩადებული ეკლესიის მიმართ დამოკიდებულება, ცხადია იქიდანაც, რომ მათ არ აქვთ გათვითცნობიერებული ზოგადად რას ნიშნავს დედა ეკლესია, ვინ არის პატრიარქი, რა არის სარწმუნოება და ღმერთი. როგორ შეიძლება, ჩვენ, მორწმუნეებმა, ღმერთთან მებრძოლ ადამიანებს მოვთხოვოთ რაიმე სიბრძნე? თუმცა, ჩვენთვის, უმრავლესობისთვის, სულ ორი-სამი დეტალიც საკმარისი იყო, როდესაც 2017 წლის გიორგობის წირვაზე, 23 ნოემბერს, პატრიარქმა იქადაგა და ხმამაღლა თქვა, რომ სწორედ წმინდა გიორგის შთაგონებით მიიღო გადაწყვეტილება მეუფე შიო მუჯირის შესახებ. როგორ გინდათ, მორწმუნე ადამიანის, საპატრიარქოს მრევლის პოზიციიდან, შევიდეთ რაიმე დისკუსიაში იმ ძალებთან, პატარა „ჭინკებთან“ და მათ უკან მდგომ სერიოზულ სისტემასთან, რომელთაც არ ესმით, რომ უფალს, ღვთისმშობელსა და დედა ეკლესიას ამ ქვეყანაში ვერ დაამარცხებენ. ათმა იმპერიამ ვერ შეძლო ამის გაკეთება და ეს იმპერიები ისტორიულ არქივებშია გადაბარებული, ხოლო მეთერთმეტე — გლობალისტურ-ლიბერალური იმპერია — ცდილობს, რომ რატომღაც თავისას მიაღწიოს,” — განაცხადა დავით ქართველიშვილმა.
