უკრაინის პრეზიდენტის, ვოლოდიმირ ზელენსკის განცხადებით, ირანში ომმა მსოფლიოს რუსეთის აგრესიიდან ყურადღება გადაატანინა და არსებობს დიდი რისკი, რომ უკრაინაში საომარი მოქმედებების დასრულების მიზნით წარმოებული მოლაპარაკებები ირანში კონფლიქტის დასრულებამდე არ განახლდება. ინფორმაციას CNN-ი ავრცელებს.
ზელენსკის თქმით, მიუხედავად იმისა, რომ ტექნიკურად აშშ-თან მოლაპარაკებები გრძელდება, შეხვედრების ჩატარება შეუძლებელია მანამ, სანამ „ირანში საქმე არ დასრულდება“.
როგორც უკრაინის ლიდერმა აღნიშნა, ეს არის გამოწვევა, რადგან აშშ-ის პრეზიდენტის, დონალდ ტრამპის ერთი და იგივე მომლაპარაკებელი გუნდი, სტივ უტკოფისა და ჯარედ კუშნერის მეთაურობით, აწარმოებს მოლაპარაკებებს როგორც ირანთან, ისე უკრაინასთან.
მისი თქმით, მას ძალიან კარგად ესმის, რომ ახლა შეერთებული შტატები ირანთან ომზეა კონცენტრირებული, თუმცა მნიშვნელოვანია უკრაინის არდავიწყება.
