აშშ-ის პრეზიდენტი დონალდ ტრამპი და პირველი ლედი მელანია ტრამპი საიდუმლო სამსახურის აგენტებმა თეთრი სახლის კორესპონდენტთა ასოციაციის ვახშამიდან სასწრაფოდ გაიყვანეს მას შემდეგ, რაც შეიარაღებულმა მამაკაცმა უსაფრთხოების ზონაში შეჭრა სცადა. ამის შესახებ „როიტერი“ იუწყება.
ვაშინგტონში გამართულ მიღებაზე, რომელსაც პრეზიდენტი ესწრებოდა, სროლა მოხდა. ქვეყნის პირველი პირები ევაკუირებულნი არიან, ხოლო ღონისძიება ერთი თვით გადაიდო. სავარაუდო თავდამსხმელი დაკავებულია, მისი მოტივები კი ამ დროისთვის უცნობია.
სროლის მსგავსი ხმები ღონისძიების კულმინაციის დროს გაისმა, რის შესახებაც სასტუმრო Washington Hilton-ის დარბაზში მყოფი BBC-ის კორესპონდენტები იტყობინებოდნენ. ამის შემდეგ დარბაზში საიდუმლო სამსახურის შეიარაღებული თანამშრომლები შეცვივდნენ. თვითმხილველების თქმით, აგენტები ყვიროდნენ, რომ გასროლები განხორციელდა. მაღალი რანგის ჩინოვნიკების ევაკუაცია დაუყოვნებლივ მოხდა. მათ შორის იყვნენ თავად დონალდ ტრამპი, მელანია ტრამპი, ვიცე-პრეზიდენტი ჯეი დი ვენსი, თავდაცვის მინისტრი პიტ ჰეგსეთი და ჯანდაცვის მინისტრი რობერტ კენედი-უმცროსი.
ვახშმის მონაწილეები გასროლის ხმის გაგონებისთანავე მაგიდების ქვეშ დაიმალნენ. BBC-ის ჟურნალისტი სუმი სომასკანდა ყვება, რომ იგი პირდაპირ FBI-ს დირექტორის, ქაშ პატელის წინ იჯდა, რომელმაც საფრთხის დროს თავისი სხეულით პარტნიორი ქალი გადაფარა და იატაკზე დაწვა. რამდენიმე წუთში აგენტებმა დაადასტურეს, რომ პატელი უსაფრთხოდ იყო. როდესაც სტუმრებმა წამოდგომა დაიწყეს, პატელი ტელეფონით შეტყობინებებს გზავნიდა, თუმცა მასთან გასაუბრება ვერავინ მოასწრო, რადგან იგი ტერიტორიიდან სასწრაფოდ გაიყვანეს.
დონალდ ტრამპმა მოგვიანებით სოციალურ ქსელში დაწერა, რომ საიდუმლო სამსახურმა და სამართალდამცავებმა ფანტასტიკური სამუშაო შეასრულეს და იმოქმედეს სწრაფად და მამაცად. მან ასევე დაადასტურა მსროლელის დაკავება. საიდუმლო სამსახურის წარმომადგენელმა ენტონი გულიელმიმ განაცხადა, რომ პრეზიდენტი, პირველი ლედი და ყველა დაცული პირი უსაფრთხოდ არიან.
CNN-ის ინფორმაციით, ხელისუფლებამ დაადგინა ეჭვმიტანილის ვინაობა: ის კალიფორნიელი 30 წლის მამაკაცია. კოლუმბიის ოლქის პოლიციის უფროსის, ჯეფრი კეროლის თქმით, ეჭვმიტანილი თავს დაესხა საიდუმლო სამსახურის საგუშაგოს. იგი შეიარაღებული იყო გადაჭრილი თოფით, პისტოლეტითა და რამდენიმე დანით. კეროლმა დააზუსტა, რომ თავდამსხმელმა ესროლა საიდუმლო სამსახურის აგენტს, თუმცა ეს უკანასკნელი ჯავშანჟილეტმა გადაარჩინა. თავად მსროლელს ცეცხლსასროლი ჭრილობები არ აღენიშნება, მაგრამ იგი სამედიცინო შემოწმებაზე გადაიყვანეს.
თეთრ სახლში გამართულ ბრიფინგზე დონალდ ტრამპმა თავდამსხმელს “ძალიან ავადმყოფი ადამიანი” უწოდა და აღნიშნა, რომ ის მარტოხელა მკვლელის შთაბეჭდილებას ტოვებს. პრეზიდენტმა ხაზი გაუსვა, რომ მომხდარმა ფსიქოლოგიური ტრავმა მიაყენა მელანია ტრამპს. ტრამპმა ასევე განაცხადა, რომ მას თავიდან წასვლა არ სურდა და დარჩენისთვის “გააფთრებით იბრძოდა”, თუმცა პროტოკოლის გამო იძულებული გახდა დამორჩილებოდა უსაფრთხოების სამსახურის მოთხოვნას, ვიდრე გაირკვეოდა, მოქმედებდა თუ არა მსროლელი მარტო.
