ვინ არის ვადიმ ტიტუშკო და როგორ გახდა მაიდნის ანტიგმირი უკრაინის გმირი

ტერმინი „ტიტუშკა“ უკრაინის უახლესი ისტორიის ერთ-ერთი ყველაზე ცნობილი და უარყოფითი სიმბოლოა. ეს სიტყვა გაჩნდა ვიქტორ იანუკოვიჩის მმართველობის დროს და დღემდე, პოსტსაბჭოთა სივრცის ქვეყნებში უწოდებენ ხელისუფლების მომხრე, სპორტული აღნაგობის ახალგაზრდებს, რომლებიც ძალადობდნენ ოპოზიციის აქტივისტებსა და ჟურნალისტებზე. ტერმინი უკავშირდება კონკრეტულ პიროვნებას — ვადიმ ტიტუშკოს, რომლის ბედიც დღეს ბევრისთვის მოულოდნელი აღმოჩნდა.

ვინ იყო ვადიმ ტიტუშკო?

ვადიმ ტიტუშკო უკრაინელი სპორტსმენი იყო, რომლის სახელი 2013 წლის 18 მაისს, კიევში, საპროტესტო აქციის დროს გახდა ცნობილი. მან და მისმა თანმხლებმა პირებმა ფიზიკური შეურაცხყოფა მიაყენეს ჟურნალისტებს, მათ შორის ოლგა სნიცარჩუკს და ვლადისლავ სოდელს. ეს ინციდენტი კამერების ობიექტივში მოხვდა და მყისიერად გავრცელდა. ტიტუშკო დააკავეს, მაგრამ მას პირობითი სასჯელი მიუსაჯეს, რამაც საზოგადოებაში დიდი აღშფოთება გამოიწვია.

ამ ინციდენტის შემდეგ, მისი გვარი გახდა კრებსითი სახელი და ტერმინი „ტიტუშკები“ (უკრ. тітушки) სწრაფად გავრცელდა პოსტსაბჭოთა ქვეყნებში. ასე უწოდებენ ყველა იმ ახალგაზრდას, რომელიც ცდილობს ხელისუფლების საწინააღმდეგო საპროტესტო აქციების ძალადობრივად დაშლას ან პროვოკაციების მოწყობას.

მოულოდნელი შემობრუნება: ტიტუშკა ფრონტზე

2022 წელს, რუსეთის მიერ უკრაინაში სრულმასშტაბიანი შეჭრის შემდეგ, ვადიმ ტიტუშკოს ბედი რადიკალურად შეიცვალა. უკრაინული მედიის და სამხედრო წყაროების ცნობით, ის შეუერთდა უკრაინის შეიარაღებულ ძალებს. ტიტუშკოს საქმე 2022 წელს დაიხურა, რის შემდეგაც ის მოქმედ არმიას შეუერთდა.

მედიის ინფორმაციით, დღეს ის 72-ე ცალკეულ მექანიზებულ ბრიგადაში „შავი ზაპოროჟიელები“ მსახურობს. ის  რაზმის მეთაურის თანამდებობას იკავებს. ამის შესახებ ინფორმაცია დაადასტურა უკრაინელმა აქტივისტმა და სამხედრო მოსამსახურემ, იგორ იუზიჩმა, რომელმაც აღნიშნა, რომ ტიტუშკო ფრონტზეა, „მაშინ, როდესაც ბევრი მაიდნის აქტივისტი სახლში ზის“.

იუზიჩმა სიტყვების დასამტკიცებლად ევგენი კონოვალეცის ციტატაც კი მოიყვანა: „ცეცხლში რკინა ფოლადად იქცევა, ბრძოლაში კი ხალხი ერად“.

ვადიმ ტიტუშკოს ბედი სიმბოლურია — ადამიანი, რომელიც ერთ დროს მაიდნის მოძრაობის ანტიგმირი იყო, ახლა უკრაინის თავისუფლებისთვის იბრძვის. ეს მაგალითი ბევრ კითხვას ბადებს საზოგადოებაში ადამიანის ცვლილებასთან და პატიების შესაძლებლობასთან დაკავშირებით, თუმცა ერთი რამ ცხადია: ომმა ბევრ უკრაინელზე იქონია გავლენა და მათი ცხოვრება შეცვალა.