რამდენიმე დღის წინ გამოცხადდა რომ სახელმწიფო დააფინანსებს ფილტვის კიბოს სკრინინგს ყოველწლიური დაბალი დასხივების ტომოგრაფიული გამოკვლევით, რაც ძალიან საჭიროა. მითუმეტეს საქართველოში მწეველთა დიდი რაოდენობის გათვალისწინებით, – წერს სოციალურ ქსელში საზოგადოება „ქართულის“ წევრი პიმენ ყურაშვილი.
ყურაშვილი განმარტავს, ვის ეკუთვნის სკრინინგი.
„ვის ეკუთვნის ეს სკრინინგი: United States Preventive Services Task Force (USPSTF) – ის რეკომენდაციების მიხედვით ადამიანი, 50 წლიდან 80 წლამდე, რომელიც ეწევა ან ეწეოდა 20 წელი დღეში ერთ კოლოფს. თუნდაც ეწეოდა ეს 20 წელი ადრე, მაგრამ 15 წელი არ არის გასული მას შემდეგ რაც შეწყვიტა მოწევა.
დღეში ერთი კოლოფი 20 წლის განმავლობაში ნიშნავს ასევე, რომ თუ მაგალითად, ადამიანი ეწეოდა ნახევარ კოლოფს, ანუ 10 ღერ სიგარეტს 40 წელი, მასაც გამოსდის რომ 20 წელი ეწეოდა ერთ კოლოფს. ან თუ 10 წელი ეწეოდა 2 კოლოფს, მასაც გამოუვა 20 წელი ერთი კოლოფი. იგივენაირად დაითვლება გეკუთვნით თუ არა სკრინინგი ინდივიდუალურ შემთხვევებში დროისა და მოწეული სიგარეტის რაოდენობის მიხედვით.
პროგნოზის მხრივ, ძალიან დიდი განსხვავებაა ადრეულ ეტაპზე აღმოჩენილ და გვიან აღმოჩენილ კიბოს შორის. ამიტომ გირჩევთ ყველას ვისაც გეკუთვნით ეს კვლევა, რომ აუცილებლად მიჰყვეთ რეკომენდაციებს და შესაბამისად ჩაიტაროთ ეს გამოკვლევა ყოველწლიურად“, – წერს პიმენ ყურაშვილი.
