ამერიკის სახელმწიფო დეპარტამენტის ყოფილმა მაღალჩინოსანმა, მაიკ ბენცმა ლიზ ტრასთან ინტერვიუში ევროპაში სიტყვის თავისუფლების საკითხზე ისაუბრა და აღნიშნა, რომ ის რაც ევროპაში სიტყვის თავისუფლების გარშემო ხდება, ორმაგი სტანდარტის მაგალითს უფრო ჰგავს და მიაჩნია, რომ ეს საკითხი ერთგვარ პოლიტიკურ იარაღად იქცა. „აშშ-ის სახელმწიფო დეპარტამენტის საზოგადოებრივი დიპლომატიის ოფისი მხარს უჭერს ევროპაში ციფრული გამოხატვის თავისუფლების ინიციატივას – ეს იყო ის, რაც ევროპაში საუკუნის განმავლობაში უდავო იყო და მხოლოდ ბოლო 10 წელია დაიწყო ცენზურის ზომების დაფინანსება, ნაცვლად სიტყვის თავისუფლების დაფინანსებისა“- აღნიშნა ბენცმა.
ბენცს მიაჩნია, რომ ევროპული ბიუროკრატია ამ თემას ძალაუფლებისა და გავლენის შესანარჩუნებლად იყენებს, რადგან მისი შეფასებით, დასავლური ინსტიტუტები გამჭვირვალობას მხოლოდ მაშინ უჭერენ მხარს, როცა ეს მათ ინტერესებში შედის, თუმცა, ეწინააღმდეგებიან იმავე ტიპის გამჭვირვალობის მიღებას, როცა საქმე სხვა ქვეყანას ეხება.
„თქვენ ხედავთ, მეინსტრიმ მედია ამის გამო აბსოლუტურად განრისხებულია და დავობს, რომ ეს არის რუსული გავლენის ოპერაცია, რომელიც, როგორც იცით, წარმოადგენს შემდეგს, რომ თითქოს აშშ-ის მთავრობის მიერ იმ ჯგუფების დაფინანსება ხდება, რომლებიც სიტყვის თავისუფლებას უჭერენ მხარს მხოლოდ იმის გამო, რომ ევროპაში მემარჯვენე პოპულისტურ პარტიებს სურთ სიტყვის თავისუფლების გამოყენება საკუთარი პროპაგანდის გასავრცელებლად და რუსებს სურთ მათი გამარჯვება იმის გამო, რომ სკეპტიკურად უყურებენ ბევრ საკითხს ნატოსა და ევროკავშირზე. ახლა დავობენ იმაზე, რომ ევროპაში საჭიროა გარკვეული გამჭვირვალობის კანონი, რათა აშშ-დან წამოსული გრანტები საჯარო იყოს. სხვათა შორის, მე ამას სრულიად ვემხრობი, თუმცა ირონიაა, რომ 15 თვის წინ, ზუსტად ევროკავშირის ბიუროკრატებისა და ფინანსურად დაინტერესებული ჯგუფების ეს კლასი, სანქციების დადებით ემუქრებოდა უნგრეთს, საქართველოს და ევროპის კიდევ სამ ქვეყანას, რომელსაც გამჭვირვალობის კანონის მიღება სურდათ. მეტიც, ფაქტობრივად, მათ ამას „რუსული კანონი“ უწოდეს, რადგან რუსეთმა მსგავსი [კანონი] 2012 წელს მიიღო. თუმცა რუსეთს ამ კანონებთან პრობლემა არ ჰქონია. პრობლემა ჰქონდათ აშშ-სა და ევროკავშირს, რომლებიც უნგრეთში სხვადასხვა ჯგუფებს აფინანსებდნენ. ევროკავშირი მათაც კი ემუქრებოდა, რომ თუ საპარლამენტო კანონპროექტი გავიდოდა, ისინი გაყინავდნენ უნგრეთისთვის გამოყოფილ მილიარდობით დოლარის დაფინანსებას, თუკი მთავრობის მიერ დაფინანსებულ ნებისმიერ არასამთავრობო ორგანიზაციას, რომელიც 23 000 დოლარზე მეტს იღებს, ამის საჯაროდ დეკლარირებას მოსთხოვდნენ. რატომ უნდა ჰქონოდათ აშშ-სა და ევროკავშირს ბაიდენის ადმინისტრაციის დროს პრობლემა გამჭვირვალობის კანონთან? იმიტომ, რომ ისინი უნგრულ მედიას, არასამთავრობო სექტორს, აკადემიურ წრეებსა და სამოქალაქო საზოგადოებას აშშ-ისა და ევროკავშირის სახსრებით ტბორავენ, რომ შეექმნათ ხელოვნური პოლიტიკური მოძრაობა ორბანის დასამხობად. ეს კეთდება იმისთვის, რომ უკრაინა ევროკავშირში შეიყვანონ და თავიდან მოიშორონ ერთადერთი ვეტოს უფლების მქონე ხმა მთელ ევროკავშირში.“- განაცხადა მაიკ ბენცმა.
