ევროკავშირი თითქმის ყველა წიაღისეული საწვავის იმპორტს ახორციელებს, რაც მას გეოპოლიტიკური კონფლიქტის წინაშე დაუცველს ხდის – წერს გამოცემა POLITICO. გამოცემის ცნობით, ევროპა ახლო აღმოსავლეთში ხანგრძლივი კონფლიქტის შედეგად ენერგორესურსების ფასების ზრდისთვის ემზადება, რაც კიდევ უფრო მეტ ზეწოლას მოახდენს ბლოკის ისედაც რთულ ეკონომიკურ მდგომარეობაზე და უფრო გამოკვეთს მის თითქმის სრულ დამოკიდებულებას უცხოურ წიაღისეულ საწვავზე.
“ირანზე აშშ-ისრაელის თავდასხმების შემდეგ, შაბათ-კვირას სპარსეთის ყურიდან ნავთობისა და გაზის მიწოდება დიდწილად შეწყდა, მას შემდეგ, რაც გავრცელდა ინფორმაცია, რომ ირანის ძალებმა გემები გააფრთხილეს ჰორმუზის ვიწრო სრუტეში გავლის შესახებ. ეს ევროპაზე მყისიერ გავლენას არ მოახდენს, რადგან ჰორმუზის სრუტეში გამავალი ნავთობისა და გაზის უმეტესი ნაწილი, რომელიც გლობალური ნავთობის ვაჭრობის დაახლოებით 20 პროცენტს შეადგენს, აზიაში მიდის”, – აღნიშნულია სტატიაში.
სიმონე ტალიაპიეტრამ, ბრიუსელში დაფუძნებული ანალიტიკური ცენტრის, Bruegel-ის უფროსმა მკვლევარმა განაცხადა, რომ “ჰორმუზის სრუტეში ნებისმიერი შეფერხება მყისიერად გამოიწვევს ფასების ზრდას, რაც ევროპას დააზარალებს, მიუხედავად იმისა, რომ მისი ფიზიკური იმპორტი ამ მარშრუტზე შეზღუდულია”.
“კრიზისი გაღრმავდება ამ ომის ხანგრძლივობის მიხედვით. თუ სიტუაცია ერთ ან ორ კვირაში ან თუნდაც ერთ თვეში მოგვარდება, შედეგები გაცილებით ნაკლები იქნება”, – თქვა ანა მარია იალერ-მაკარევიჩმა, ენერგეტიკული ეკონომიკისა და ფინანსური ანალიზის ინსტიტუტის წამყვანმა ენერგეტიკულმა ანალიტიკოსმა. მაგრამ თუ ის, უკრაინის ომის მსგავსად, წლების განმავლობაში გაგრძელდება, შედეგები ევროპისთვის შეიძლება მნიშვნელოვანი იყოს.
ევროკავშირი უკვე რუსული ნავთობისა და გაზისგან თავის შეკავების პროცესშია და სულ უფრო მეტად შეშფოთებულია, რომ მისი მზარდი დამოკიდებულება შეერთებულ შტატებზე თხევადი ბუნებრივი აირის მიმართ სარისკოა, რადგან ევროკავშირ-აშშ-ს ურთიერთობები წელს ყველა დროის მინიმუმამდე დავიდა.
“ვფიქრობ, ევროპისთვის ეს პანიკის მომენტს ქმნის”, – თქვა იალერ-მაკარევიჩმა.
“ოთხი წლის წინ [რუსეთის უკრაინაში შეჭრის შემდეგ] ჩვენ ეს პრობლემები გვქონდა”. თუმცა, ამჯერად, მისი თქმით, “ჩვენ ახლა არა მხოლოდ რუსეთი გვაშფოთებს, არამედ კატარი, აშშ… ამიტომ, ვფიქრობ, რომ ახლა, რადგან სხვა წყაროებზე დამოკიდებულება გავზარდეთ, ჩვენი დაუცველობაც გავზარდეთ”“.
