უკრაინის უზენაესმა სასამართლომ პირველად აღიარა ერთნაირსქესიანი წყვილი ოჯახად, – ამის შესახებ ორგანიზაცია Insight LGBTQ-ზე დაყრდნობით „რბკ- უკრაინა“ წერს.
ორგანიზაციის ინფორმაციით, თებერვლის ბოლოს უკრაინის უზენაესმა სასამართლომ უარყო მოძრაობის „ყველა ერთად“ საკასაციო საჩივარი და ძალაში დატოვა ქვედა ინსტანციის სასამართლოს გადაწყვეტილება, რომლითაც დადგინდა ორი მამაკაცის ერთ ოჯახად ცხოვრება.
საქმე ეხება ისრაელში უკრაინის საელჩოს პირველი მდივნის, ზორიან კისისა და საზოგადოებრივი აქტივისტის, ტიმურ ლევჩუკის ურთიერთობას. როგორც მედია წერს, ისინი ერთად ცხოვრობენ 2015 წლიდან. 2021 წელს წყვილი აშშ-ში ოფიციალურად დაქორწინდა, თუმცა უკრაინის კანონმდებლობა ასეთ კავშირებს არ აღიარებს.
2024 წელს ზორიან კისი დაინიშნა ისრაელში უკრაინის საელჩოს პირველ მდივნად, თუმცა უკრაინის საგარეო საქმეთა სამინისტრომ, უკრაინულ კანონმდებლობაზე დაყრდნობით, უარი თქვა მისი პარტნიორის ოჯახის წევრის სტატუსით ისრაელში გადასვლის უფლების გაცემაზე.
კისმა სასამართლოს მიმართა. 2025 წლის ივნისში კიევის დესნიანსკის რაიონულმა სასამართლომ პირველად აღიარა, რომ წყვილი ფაქტობრივ ქორწინებით ურთიერთობაში იმყოფებოდა. მოგვიანებით, მოძრაობამ „ყველა ერთად“ უზენაეს სასამართლოში საკასაციო საჩივარი შეიტანა, თუმცა ის მიმდინარე წლის თებერვლის ბოლოს არ დაკმაყოფილდა.
მედია განმარტავს, რომ უზენაესი სასამართლოს გადაწყვეტილება უკრაინაში ერთნაირსქესიანწყვილთა ქორწინებას არ აკანონებს, თუმცა ადგენს ერთ ოჯახად თანაცხოვრების ფაქტს, ანუ ფაქტობრივ ქორწინებით ურთიერთობას.
Insight LGBTQ-ში უზენაესი სასამართლოს გადაწყვეტილებას „უდიდეს პრეცედენტს“ უწოდებენ:
„ვერცერთი ჰომოფობიური ან კონსერვატიული ორგანიზაცია ვეღარ გამოიყენებს სასამართლოებს ინსტრუმენტად ლგბტქ+ ადამიანების წინააღმდეგ გადაწყვეტილებების გასაუქმებლად ან მათი დევნისთვის „საზოგადოებრივი მორალის“ მოტივით. სახელმწიფომ დაიცვა პირადი ცხოვრების საზღვრები“, – ნათქვამია ორგანიზაციის განცხადებაში.
