სომხეთის პრემიერ-მინისტრმა ნიკოლ ფაშინიანმა Facebook-ის ვიდეომიმართვაში განაცხადა, რომ ამ ეტაპზე სომხეთისთვის არალოგიკურია რეფერენდუმის ჩატარება ევროკავშირში გაწევრიანების ან ევრაზიულ ეკონომიკურ კავშირში წევრობის შენარჩუნების შესახებ.
მისი თქმით, ქვეყანა გააგრძელებს „მშვიდად, კამათისა და ნერვების გარეშე“ მუშაობას ევრაზიულ ეკონომიკურ კავშირში მანამ, სანამ არჩევანი გარდაუვალი არ გახდება, იუწყება „Sputnik სომხეთი“.
ფაშინიანმა რეფერენდუმის ჩატარების დროს „მნიშვნელოვანი საკითხი“ უწოდა, თუმცა მიანიშნა, რომ მას ჯერჯერობით აქტუალურად არ მიიჩნევს.
„მინიმუმ იმ მომენტამდე, სანამ სომხეთი ოფიციალურად არ მიმართავს ევროკავშირს წევრობის საკითხზე ან ახლოს არ იქნება წევრობის კანდიდატის სტატუსის მიღებასთან, ნებისმიერი რეფერენდუმის ჩატარება არალოგიკურია“, — განაცხადა მან.
პრემიერ-მინისტრი ცალკე შეეხო სომხეთისა და რუსეთის ურთიერთობების თემასაც. მან გაიმეორა თავისი თეზისი იმის შესახებ, რომ მიმდინარეობს ამ ურთიერთობების ტრანსფორმაცია, რაც, მისი აზრით, პოზიტიური პროცესია.
„ახალ სიტუაციაში ჩვენ ვამყარებთ ახალ ურთიერთობებს და დარწმუნებული ვარ, რომ ამ საკითხში წარმატებას მივაღწევთ. მათ შორის იმის გამოც, რომ რუსეთის ფედერაციასთან ჩვენი ურთიერთობები არის ღია, გულწრფელი და არ გაგვაჩნია ბნელი კუთხეები“, — ციტირებს სააგენტო ფაშინიანის სიტყვებს.
