სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი საქართველოს პარლამენტის დროებითი კომისიის სხდომაზე, კომისიის წევრები, სასურსათო პროდუქციის ბაზრის სტრუქტურას, ფასწარმოქმნის ჯაჭვს და სექტორის საოპერაციო ხარჯებს, სადისტრიბუციო კომპანიების წარმომადგენლებთან ერთად განიხილავენ.
კომისიის თავმჯდომარის, შოთა ბერეკაშვილის შეფასებით, დისტრიბუციის ნაწილში, ფასნამატი ძალიან მაღალია, შესაბამისად, საჭიროა დადგინდეს, რა იწვევს ამ რგოლში ფასების მატებას.
“თქვენ ხართ მსხვილი დისტრიბუტორები და ბაზარზე მნიშვნელოვანი წილი არის თქვენი. განსაკუთრებით დისტრიბუციის ნაწილში, ძალიან მაღალია ფასნამატი. არის სექტორში ფასნამატი, რომელიც სტანდარტია სხვა ქვეყნებში და სამწუხაროდ, მათთან შედარებით, ძალიან მაღალია. ჩვენი პირველადი შეფასებით, ეს არის კონკრეტული საოპერაციო ხარჯებიდან გამოწვეული და გვინდა, სწორად გვესმოდეს, რა იწვევს ასეთ მაღალ ფასნამატს თქვენს რგოლში, რასთან გვაქვს საქმე, როგორ შეგვიძლია ოპტიმიზაცია, რომ კიდევ ერთხელ სწორად დავინახოთ პრობლემები. ჩვენი მიზანია, სწორი ინსტრუმენტების დანერგვით, გავასწოროთ და გავაჯანსაღოთ სექტორში ურთიერთობები. მზად ვართ, რომ ამ საკითხზე დღეს ღია დისკუსია გვქონდეს,” – განაცხადა შოთა ბერეკაშვილმა.
