წარმოუდგენელია, რაზე არის საუბარი, რა ალიანსებში გაერთიანებაზე? ჩვენ ვართ დამოუკიდებელი პოლიტიკური ძალა ჩვენი პოლიტიკური დღის წესრიგით და ამ ხაზს ვაგრძელებთ, – ამის შესახებ „ლელო – ძლიერი საქართველოს“ წევრმა, ლანა გალდავამ განაცხადა.
გალდავას „ოპოზიციის ალიანსის“ ერთ-ერთი ლიდერის, ნიკა გვარამიას განცხადებაზე დაუსვეს კითხვა.
„„ლელო“ შეიქმნა იმ მიზნით, რომ ამ ქვეყანაში დასრულებულიყო ორპოლუსიანობა. ძლივს მივიღეთ მოცემულობა, როდესაც „ქართული ოცნება“ არის ცალკე, „ნაციონალური მოძრაობა“ – ცალკე და „ლელო“ თავისი პოლიტიკური დღის წესრიგით აგრძელებს პოლიტიკურ საქმიანობას. ამიტომ საერთოდ წარმოუდგენელია, რაზე არის საუბარი, რა ალიანსებში გაერთიანებაზე? ჩვენ ვართ დამოუკიდებელი პოლიტიკური ძალა ჩვენი პოლიტიკური დღის წესრიგით. ვაგრძელებთ ამ ხაზს, რაც არის დამოუკიდებლად ჩვენი პარტიის განვითარება და ის სტრატეგიები, მიზნები, რაც ასევე დამოუკიდებლად გვაქვს“, – განაცხადა ლანა გალდავამ.
ცნობისთვის, „ოპოზიციის ალიანსის“ ერთ-ერთი ლიდერი ნიკა გვარამია მიიჩნევს, რომ პარტიები „ლელო – ძლიერი საქართველო“ და „გახარია საქართველოსთვის“ ალიანსში უნდა მიიღონ.
