26 მაისის აქცია არის „ნაციონალური მოძრაობის“ და ევროკავშირის აგენტურის მიერ დაგეგმილი აქცია. რა თქმა უნდა, ეს აქციაც იქნება ფუჭი მცდელობა მათი მხრიდან, საზოგადოებაში არავითარი საპროტესტო მუხტი დღეს არ არსებობს, – განაცხადა ანალიტიკოსმა, ნიკოლოზ მეტრეველმა, პრესკონფერენციაზე.
მეტრეველი „ნაციონალურ მოძრაობას“ და ევროკავშირის აგენტურას მოიხსენიებს „ბოროტ ძალად“ და აცხადებს, რომ ისინი მიმართული არიან იმისკენ, რომ ქვეყანაში ყველა სიკეთეს ებრძოლონ.
„არის აბსოლუტური სიმშვიდე, ეკონომიკური განვითარება და ეს აქცია იქნება ძალიან მცირე რაოდენობის ადამიანების გამოსვლა და დასრულდება ისე, როგორც სხვა აქციები სრულდებოდა – აბსოლუტურად უშედეგოდ. ესენი არიან დასავლეთის დავალებების შემსრულებელი უსამშობლო აგენტები. ჩვენ ვნახეთ, რომ უფროსებმა მათ დასავლეთიდან წერილიც კი გამოუგზავნეს, ეს ერთ-ერთი მაშველი რგოლი იყო მათთვის. ესენი ებრძვიან ყველაფერს. უსამშობლო აგენტების დავალება არის ევროკავშირის მხრიდან წამოსული, რომ ებრძოლონ ყველაფერ ქართულს, ყველაფერ ადამიანურს, რაც არის ჩვენს ქვეყანაში; ყველა სიკეთეს ებრძოლონ. ეს არის ბოროტი ძალა, რომელიც ცდილობს ქვეყანა უკან დახიოს და შეუშალოს მას განვითარება. ეს არის რეალობა,“- განაცხადა ნიკოლოზ მეტრეველმა.
